Nani asiye na meno, asojuwa kutafuna?
Avitikise viuno, hadharani tumuwona!
Miguu na visigino, na njaa asopambana!
Mavi usoyala mbona, nawe kuku wawawinga?
Us'o hata moya yino, mdomo uloshikana!
Usiye na mzozano, uchu wala tumbo huna!
Mbeleni pa makutano, kashangaze hadhirina!
Mavi usoyala mbona, nawe kuku wawawinga?
Kinywato tenye mshono, kizibwato kisinena
Kwao uzi na sindano, tito kimeshikamana
Wata mbwende za maneno, vitendo mmekazana
Mavi usoyala mbona, nawe kuku wawawinga?
Wengi wana mapambano, maghala kujalizana
Mahindi njugu na ngano, kusudi kushibishana
Kuku utafu mdono, wapitapo tunanuna!
Mavi usoyala mbona nawe kuku wawawinga?
Nimekoma beti tano, tuwate kususiana
Hata wawe konokono, ni viumbe vya Rabana
Ujapovila vinono, mwenzio simtukana!
Mavi usoyala mbona, nawe kuku wawawinga?
(DIWANI YA "MRATIBU", 2013)