Nguruwe nilimcheka, alipodara sakafu
Panya 'kamega mkeka, kutanga uharibifu
Mbona twavuka mipaka, vitendo vya uzinifu
Ukikogea machafu, hutakati; utanuka!
Ghulamu nyele kusuka, vipini, hina, mikufu
Mihadarati 'bazoka', twatafuna tafutafu!
Twajenga kwenye mizuka, twapitwa na uraufu!
Ukikogea machafu, hutakati; utanuka!
Mabinti mmtekeka, 'vinyo kali na midafu
Mavazi mnojivika, yadhihiri maumbifu
Vichusi mnaatika, hamchi Mtakatifu!
Ukikogea machafu, hutakati; utanuka!
Usiri huu pulika, epukeni udhurifu
Wenye haiba twataka, hodari sio dhaifu!
Watetezi kadhalika, waungao unadhifu
Ukikogea machafu, hutakati; utanuka!
Limehaririwa Alhamisi 10, Mei 2015.
Hakuna maoni:
Chapisha Maoni